न्यायालयाच्या आवारातून आरोपीची पोलीस कोठडीतून धाडसी पळ काढण्याची घटना; आणखी एक गुन्हा दाखल
वडगाव मावळ, दि. २८ (प्रतिनिधी): वडगाव मावळ येथील प्रथमवर्ग न्यायदंडाधिकारी न्यायालयाच्या आवारातून पोलीसांच्या ताब्यातील आरोपीने बेडीसह पळ काढल्याची धक्कादायक घटना रविवारी सकाळी घडली. या प्रकरणी आरोपीविरुद्ध भारतीय न्याय संहिता (BNS) कलम 262 अन्वये वडगाव मावळ पोलीस ठाण्यात स्वतंत्र गुन्हा दाखल करण्यात आला आहे.
पोलीस निरीक्षक शंकर पाटील यांनी दिलेल्या माहितीनुसार, इमरान गफार शेख (वय 20, रा. सिद्धार्थ नगर, लोणावळा, ता. मावळ, जि. पुणे) यास कामशेत पोलीस ठाण्यात दाखल असलेल्या गुन्ह्यात न्यायालयात हजर करण्यात आले होते. सकाळी सुमारे 10.35 वाजण्याच्या सुमारास न्यायालयाने आरोपीला रिमांड दिल्यानंतर पोलीस कर्मचारी त्याला न्यायालयाबाहेर आणत होते.
यावेळी पोलीस शिपाई मारकड यांनी आरोपीच्या हातात बेडी घालून तिची चावी खिशात ठेवत असताना आरोपीने अचानक झटापट केली. पोलीस कर्मचाऱ्याच्या हाताला हिसका देत आरोपी इमरान शेख हा बेडीसह पोलीसांच्या कायदेशीर ताब्यातून पळून गेला. या घटनेमुळे न्यायालय परिसरात काही काळ एकच खळबळ उडाली.
या प्रकरणी कामशेत पोलीस ठाण्यात कार्यरत पोलीस शिपाई कैलास बबन गारगोटे (बकल नं. 424) यांनी दिलेल्या फिर्यादीवरून वडगाव मावळ पोलीस ठाण्यात गुन्हा रजिस्टर क्रमांक 199/2026 नोंद करण्यात आला आहे.
घटनेची माहिती तत्काळ वरिष्ठ अधिकाऱ्यांना देण्यात आली असून वर्दी रिपोर्ट प्रथमवर्ग न्यायदंडाधिकारी, वडगाव मावळ न्यायालयाकडे पाठविण्यात आला आहे. फरार आरोपीचा शोध घेण्यासाठी पोलीस पथके रवाना करण्यात आली असून विविध ठिकाणी शोधमोहीम सुरू आहे.
या गुन्ह्याचा पुढील तपास GPSI जाधवराव करीत असून दाखल अमलदार म्हणून सहायक फौजदार काळे यांनी कामकाज पाहिले आहे. आरोपीचा शोध घेण्यासाठी पोलीसांकडून युद्धपातळीवर प्रयत्न सुरू आहेत
