वडगाव नगरपंचायत निवडणूक : भाजप उमेदवार मृणाल म्हाळसकर यांच्या प्रचाराचा शुभारंभ शनिवारी
वडगाव | प्रतिनिधी – वडगाव नगरपंचायत सार्वत्रिक निवडणूक २०२५ च्या पार्श्वभूमीवर भारतीय जनता पार्टीच्या नगराध्यक्ष पदाच्या उमेदवार मृणाल गुलाबराव म्हाळसकर यांच्या प्रचाराचा भव्य शुभारंभ शनिवारी दिनांक २२ नोव्हेंबर २०२५ दुपारी १२:३० वाजता होणार आहे. या कार्यक्रमासाठी भाजप महाराष्ट्र प्रदेशाध्यक्ष रवींद्र चव्हाण विशेष उपस्थित राहणार असून, पारंपरिक पद्धतीनुसार प्रचाराचा नारळ फोडून प्रचार मोहीमेची सुरुवात करण्यात येणार आहे. अशी माहिती निवडणूक प्रभारी भास्करराव म्हाळसकर यांनी दिली.
पक्षाच्या वरिष्ठ नेतृत्वाच्या उपस्थितीमुळे हा प्रचार शुभारंभ वडगावमध्ये भाजपच्या शक्तीप्रदर्शनाचा महत्त्वाचा टप्पा मानला जात आहे. शहरातील विविध बूथांवर व कार्यकर्त्यांमध्ये उत्साहाचे वातावरण आहे.
मृणाल म्हाळसकर या युवा व सक्रिय उमेदवार म्हणून ओळखल्या जातात. स्वच्छ व पारदर्शक प्रशासन, नागरिककेंद्री निर्णय आणि विकासाला गती देणे हा आपला प्रमुख अजेंडा असल्याचे त्यांनी स्पष्ट केले आहे.
शुभारंभ कार्यक्रमानंतर शहरातील प्रमुख भागांतून मिरवणूक काढण्यात येणार असून मोठ्या संख्येने कार्यकर्ते, पदाधिकारी व नागरिक सहभागी होण्याची शक्यता आहे. आगामी काही दिवसांत घरगुती भेटी, लहान सभा, नागरिक संवाद कार्यक्रम आणि विभागनिहाय प्रचारयोजना राबविण्याची तयारी सुरू आहे.
