ग्रामीण भागातील भाडेकरूंची माहिती पोलीस ठाण्याला देण्याचे अपर जिल्हा दंडाधिकारी यांचे आदेश
पुणे : पुणे ग्रामीण भागात वाढत्या लोकसंख्येसोबतच औद्योगिक वसाहतींमुळे बाहेरून मोठ्या प्रमाणावर मजुर, कर्मचारी व विविध कामगार वर्ग येऊन राहू लागला आहे. यामुळे ग्रामीण भागात घरमालकांकडून भाड्याने घरे देण्याचे प्रमाणही लक्षणीयरीत्या वाढले आहे. मात्र, याच पार्श्वभूमीवर सुरक्षेचा प्रश्न अधिक गंभीर होत असल्याने भाडेकरूंची माहिती स्थानिक पोलीस ठाण्याकडे अनिवार्यपणे सादर करण्याचे आदेश अपर जिल्हा दंडाधिकारी ज्योती कदम यांनी जारी केले आहेत.
घरमालकांनी भाडेकरू ठेवताना पुढील माहिती व कागदपत्रे स्थानिक पोलीस ठाण्यात द्यावी –
भाडेकरूचे पूर्ण नाव
सध्याचा पत्ता व मूळ पत्ता
दोन पासपोर्ट आकाराची छायाचित्रे
भाडेकरूला ओळखणाऱ्या व्यक्तीचे नाव व पत्ता
भाडे करारनामा
ओळखपत्र (जसे आधारकार्ड, मतदार ओळखपत्र, पॅनकार्ड आदी)
ग्रामीण भागात विविध ठिकाणी गुन्हेगारी, चोरी, फसवणूक तसेच दहशतवादी कारवायांचा धोका वाढलेला आहे. अशा परिस्थितीत कोणताही गुन्हा घडल्यास तात्काळ तपास व गुन्ह्याची उकल होण्यासाठी भाडेकरूंची नोंद पोलीसांकडे असणे आवश्यक असल्याचे आदेशात स्पष्ट करण्यात आले आहे.
या आदेशांचे उल्लंघन करणाऱ्या घरमालकांवर भारतीय न्याय संहिता कलम 223 नुसार दंडनीय कारवाई होणार आहे. त्यामुळे घरमालकांनी जबाबदारीने भाडेकरूंची संपूर्ण माहिती पोलीस ठाण्याकडे सादर करणे बंधनकारक आहे.
हे आदेश पुढील दोन महिन्यांसाठी लागू राहतील. त्यानंतर परिस्थितीनुसार प्रशासनाकडून पुढील निर्णय घेण्यात येईल, असेही अपर जिल्हा दंडाधिकारी कदम यांनी नमूद केले आहे.
प्रतिनिधी = गणेश नामदेव भेगडे. मो. ९९२१८०७०११
