तळेगाव दाभाडे नगरपरिषदेचा निष्काळजीपणा! दोन वर्षं जुना विसर्जन हौद ‘डेंगू प्लांट’ बनला
तळेगाव दाभाडे : शहरात विकासाच्या नावाने लाखो रुपयांचे फुगवलेले दाखले मिरवणारी तळेगाव दाभाडे नगर परिषद, प्रत्यक्षात मात्र काही फुटांवर उभ्या असलेल्या समस्येकडे कानाडोळा करत असल्याचे धक्कादायक वास्तव उघड झाले आहे. नथूभाऊ भेगडे पाटील प्राथमिक शाळेजवळ नगरपरिषदेनं दोन वर्षांपूर्वी पक्क्या स्वरूपात बांधलेला कृत्रिम विसर्जन हौद आज ‘डेंगू-मलेरिया केंद्र’ बनला असून प्रशासन मात्र गाढ झोपेत आहे.
गणेश विसर्जनासाठी बांधलेला हा हौद वर्षभर रिकामा करण्याची तर सोय दूरच, पण हौदातील पाणी काढण्याची तसदीदेखील नगरपरिषदेनं आजपर्यंत घेतलेली नाही. परिणामी या स्थिर पाण्यात डेंगू आणि मलेरियाचे डास मोठ्या प्रमाणात वाढत असून परिसरातील नागरिक भयभीत झाले आहेत.
या हौदापासून अवघ्या पन्नास फूट अंतरावर शाळेचे मैदान आहे, जिथे रोज शेकडो विद्यार्थी खेळतात. जवळच जुनी नगरपरिषद इमारत, शॉपिंग कॉम्प्लेक्स आणि घनदाट रहिवासी वस्त्या आहेत. एवढ्या महत्त्वाच्या जागेत असलेला डासांचा उगमस्थान ठरलेला हौद नगरपरिषदेला दिसत नाही, हीच खरी कमाल! हाकेच्या अंतरावर असलेल्या इमारतीत बसलेले अधिकारी मात्र ‘काहीच माहिती नाही’च्या धाटणीने मौनव्रत पाळताना दिसतात.
नागरिकांनी वारंवार तक्रारी करूनही हौद कोरडा करण्याची मागणी धुडकावण्यात येत असल्याचा आरोप आहे. शहरात डेंगूच्या रुग्णांची संख्या वाढत असताना प्रशासनाचा हा निष्काळजीपणा गंभीर प्रश्न निर्माण करतो.
नागरिकांचा सवाल एकच — “हौद भरणे सोपे, पण डासांनी भरलेला हौद रिकामा करायला एवढी कसरत कशाला?”
नगरपरिषद प्रशासनाने तात्काळ कृती करीत हौद पूर्णपणे कोरडा करण्याची मागणी जोर धरत आहे.
प्रतिनिधी=गणेश नामदेव भेगडे.मो९९२१८०७०११
