तळेगाव दाभाडे नगरपरिषद निवडणुकीत ४९.२४ टक्के मतदान; शांततेत प्रक्रिया पार पडली
तळेगाव दाभाडे – तळेगाव दाभाडे नगरपरिषद निवडणुकीत आज मतदान शांततेत आणि उत्साहात पार पडले. संपूर्ण शहरातील मतदारांनी लोकशाहीच्या सणात सहभाग नोंदवताना एकूण ४९.२४ टक्के मतदानाची नोंद झाली. सकाळी मंद गतीने सुरुवात झालेल्या मतदान प्रक्रियेला दुपारनंतर गती मिळाली.
निवडणूक निर्णय अधिकारी यांनी दिलेल्या माहितीनुसार,
पुरुष मतदार – १६,५५५
महिला मतदार – १५,२९१
इतर – ०
अशा मिळून एकूण ३१,८४६ मतदारांनी मतदानाचा हक्क बजावला.
महिला मतदारांनीही उत्साहाने सहभाग नोंदवत पुरुषांच्या बरोबरीने उपस्थिती दाखवली. सकाळपासून मतदान केंद्रांवर सुरक्षा व्यवस्था तैनात करण्यात आली होती. नागरिकांना अडथळा न येता मतदान करता यावे यासाठी प्रशासनाकडून सर्व आवश्यक सोयी उपलब्ध करून देण्यात आल्या होत्या.
शहरातील अनेक प्रभागांमध्ये तरुण मतदारांचेही लक्षणीय प्रमाणात सहभाग दिसून आला. मतदान केंद्राबाहेर युवक-युवतींच्या रांगा दिसत असल्याने निवडणुकीबाबत जागरूकता वाढल्याचे चित्र पाहायला मिळाले.
दिवसभर मतदारांच्या प्रतिसादात चढ-उतार दिसून आले असले तरी अखेरीस जवळपास अर्ध्या मतदारांनी मतदान करून लोकशाही प्रक्रियेत सहभाग नोंदवला. दरम्यान, मतदानानंतर शहरात कोणतीही अप्रिय घटना घडली नसल्याचे पोलिसांनी सांगितले.
