राष्ट्रवादी काँग्रेसने तळेगाव दाभाडे नगरपरिषदेच्या निवडणुकीसाठी फुंकले रणसिंग. इच्छुकांकडून मागवले उमेदवारी अर्ज
तळेगाव दाभाडे : आगामी नगरपरिषद निवडणुकीच्या पार्श्वभूमीवर राष्ट्रवादी काँग्रेस पक्षाने इच्छुक उमेदवारांकडून उमेदवारी अर्ज मागविण्याची प्रक्रिया सुरू केली आहे. इच्छुक कार्यकर्त्यांनी आपले अर्ज शनिवारी, दिनांक १८ ऑक्टोबर २०२५ पर्यंत सादर करावेत, असे आवाहन तळेगाव दाभाडे शहर राष्ट्रवादी काँग्रेस पक्षाच्या वतीने करण्यात आले आहे.
ही माहिती शहराध्यक्ष सुरेश धोत्रे, आमदार सुनिल शेळके आणि तालुका अध्यक्ष गणेश खांडगे यांनी प्रसिध्दी पत्रका द्वारे दिली.
नगरपरिषदेच्या प्रभागनिहाय आरक्षणाची घोषणा झाल्यानंतर पक्षाने शहराच्या सर्वांगीण विकासासाठी एकजुटीने निवडणुकीला सामोरे जाण्याचा निर्णय घेतला आहे. त्या अनुषंगाने उमेदवारी अर्ज मागविण्याची प्रक्रिया पारदर्शक आणि सुलभ ठेवण्यात आली आहे.
उमेदवारी अर्जांचे वितरण व सादरीकरण १६ ते १८ ऑक्टोबर २०२५ या कालावधीत करण्यात येणार आहे. या कालावधीत इच्छुक कार्यकर्ते सुरेश धोत्रे यांच्या शुभम कॉम्प्लेक्समधील जनसंपर्क कार्यालयात जाऊन अर्ज प्राप्त करू शकतात.
भरलेले अर्ज शनिवार, १८ ऑक्टोबर रोजी सायं. ६.०० वाजेपर्यंत याच ठिकाणी जमा करणे आवश्यक आहे. त्यानंतर प्राप्त झालेले अर्ज ग्राह्य धरले जाणार नाहीत, अशी स्पष्ट सूचना देण्यात आली आहे.
अर्ज स्वीकृतीनंतर रविवारी, १९ ऑक्टोबर रोजी सकाळी १० वाजता, खांडगे पेट्रोल पंपाजवळील इशा हॉटेल येथे इच्छुक उमेदवारांच्या मुलाखती घेण्यात येतील. या बैठकीदरम्यान उमेदवारांच्या कार्याचा आढावा घेऊन पुढील निर्णय जाहीर केला जाईल.
सर्व इच्छुकांनी आपले अर्ज आवश्यक कागदपत्रांसह वेळेत सादर करून संपर्क साधावा, असे आवाहन शहराध्यक्ष सुरेश धोत्रे यांनी केले आहे.
प्रतिनिधी=गणेश नामदेव भेगडे.मो९९२१८०७०११
