लोणावळा ते निगडी या मार्गावरील बस थांब्यावर प्रवाशांसाठी निवारा शेडच नाही
तळेगाव दाभाडे : लोणावळा ते निगडी या मार्गावर पीएमपी च्या बस धावत असतात मात्र या मार्गावरील अनेक ठिकाणच्या बस थांब्यावर प्रवाशांसाठी निवारा शेडच नाही. त्यामुळे प्रवाशांना ऊन. पावसात उभे राहून बसची वाट पाहावी लागते. त्या मार्गावर अनेक शालेय विद्यार्थी व कामगार वर्ग बसने प्रवास करत असतात. अनेक बस स्टॉप हे उघड्या जागेवर आहेत त्यामुळे या मार्गावरील बस थांब्यावर शेड उभारण्यात यावीत अशी मागणी अनेक प्रवाशांनी केली आहे.
मध्यंतरी आमदार सुनील शेळके व खासदार श्रीरंग बारणे यांनी या मार्गावर चांगल्या पद्धतीचे बस थांबे उभारण्यात येणार असल्याची घोषणा केली होती. मात्र त्या घोषणांचे पुढे काय झाले? असे या मार्गाने प्रवास करणारे प्रवासी विचारत आहे.
लोणावळा ते निगडी या मार्गावरील प्रवाशांचे संख्या जास्त आहे परिणामी हा मार्ग पीएमपी साठी आर्थिक दृष्ट्या फायदेशीर ठरणारा वाहतुकीचा मार्ग आहे. असे असताना देखील या मार्गावर अनेक ठिकाणी बस थांबे नाहीत. तसेच अनेक ठिकाणी बस थांब्याचा फलकच नसल्याने प्रवाशांना नक्की कोठे थांबावे हा मोठा प्रश्न आहे.
ऊन पावसात बसची वाट पाहत उभे असल्याचे प्रवाशांचे चित्र या मार्गावर दिसत आहे. बस स्थानकाच्या निवारा शेडचा वनवास कधी संपेल? असे प्रवासी विचारत आहे. तरी आमदार खासदार यांनी पुढाकार घेऊन बस स्थानकाजवळ निवारा शेड उभारावा अशी मागणी प्रवासी वर्गाकडून होत आहे.
प्रतिनिधी =गणेश नामदेव भेगडे. ९९२१८०७०११
