लोणावळ्यातील औढै खुर्द येथे उत्पादन शुल्कची धडक कारवाई; ७०० लिटर गावठी दारूसह चारचाकी जप्त, दोघांना अटक
लोनावळा:पुणे परिसरात राज्य उत्पादन शुल्क विभागाने अवैध दारूविरोधात मोठी आणि निर्णायक कारवाई करत तब्बल ७०० लिटर गावठी दारू व एक चारचाकी वाहन जप्त केले आहे. या कारवाईत दोन आरोपींना अटक करण्यात आली असून, जप्त मुद्देमालाची एकूण किंमत सुमारे ५ लाख ७४ हजार रुपये असल्याची माहिती अधिकाऱ्यांनी दिली.
लोणावळा ग्रामीण पोलीस स्टेशनच्या हद्दीत औढे खुर्द येथे ही कारवाई करण्यात आली. बेकायदेशीररित्या गावठी दारूची वाहतूक व साठवणूक होत असल्याची गोपनीय माहिती राज्य उत्पादन शुल्क विभागाला मिळाली होती. त्या माहितीच्या आधारे पथकाने नियोजनबद्ध सापळा रचत धडक कारवाई केली. कारवाईदरम्यान दारू वाहतुकीसाठी वापरण्यात आलेले चारचाकी वाहन (अंदाजे किंमत ५ लाख रुपये) ताब्यात घेण्यात आले, तसेच मोठ्या प्रमाणावर गावठी दारू जप्त करण्यात आली.
या प्रकरणी एक गुन्हा दाखल करण्यात आला असून तो वारस स्वरूपाचा असल्याची नोंद करण्यात आली आहे. हे प्रकरण बेवारस नसल्याचेही अधिकाऱ्यांनी स्पष्ट केले. आरोपींकडून जप्त करण्यात आलेल्या दारूमुळे परिसरात होणारी संभाव्य आरोग्यहानी आणि कायदा-सुव्यवस्थेचा प्रश्न टळल्याचे प्रशासनाने सांगितले.
ही कारवाई राज्य उत्पादन शुल्क विभागाचे अधिक्षक अतुल कानडे, उपअधिक्षक सुजित पाटील (तळेगाव दाभाडे) आणि निरीक्षक उत्तम आव्हाड यांच्या मार्गदर्शनाखाली पार पडली. याप्रकरणाचा तपास दुय्यम निरीक्षक ए. एस. तांदळे करत असून, पी. जी. रुईकर (दुय्यम निरीक्षक), रोहिदास गायकवाड व प्रदीप गवळी (जवान) यांनी कारवाईत महत्त्वाची भूमिका बजावली.
मावळ तालुक्यात बेकायदेशीर दारू निर्मिती व विक्रीला आळा घालण्यासाठी अशाच प्रकारच्या कारवाया पुढेही सुरू राहणार असल्याचा इशारा प्रशासनाने दिला आहे. या कारवाईमुळे अवैध दारू व्यवसायिकांमध्ये खळबळ उडाली असून, परिसरात कायदा-सुव्यवस्था राखण्यासाठी प्रशासन सज्ज असल्याचे स्पष्ट झाले आहे.
प्रतिनिधी=गणेश नामदेव भेगडे.मो९९२१८०७०११
