सुशिक्षितांची अस्वच्छता! नाना भालेराव कॉलनीत कचऱ्याचा कळस
तळेगाव दाभाडे:स्टेशन परिसरातील नाना भालेराव कॉलनी सध्या कचऱ्याच्या गंभीर समस्येने त्रस्त झाली आहे. कॉलनीतील काही नागरिकांकडून दररोज रस्त्याच्या कडेला सर्रास कचरा टाकला जात असल्याने परिसराचे विद्रूपीकरण झाले असून नागरिकांच्या आरोग्याचा प्रश्न निर्माण झाला आहे.
रस्त्यावर टाकलेला कचरा भटके कुत्रे संपूर्ण कॉलनीत पसरवत असल्यामुळे दुर्गंधी वाढली असून संसर्गजन्य आजारांचा धोका देखील वाढत आहे. विशेष म्हणजे, कचरा टाकणाऱ्यांमध्ये उच्च शिक्षित नागरिक, वैद्यकीय शिक्षण घेणारे तसेच सुशिक्षित व्यक्तींचा समावेश असल्याने ही बाब अधिकच धक्कादायक ठरत आहे.
कॉलनीमध्ये दररोज सकाळी नियमितपणे घंटागाडी येत असतानाही काही नागरिक जाणीवपूर्वक कचरा घंटागाडीत न टाकता थेट रस्त्यावर फेकत असल्याचे चित्र आहे. त्यामुळे स्वच्छतेबाबत नागरिकांची उदासीनता स्पष्टपणे दिसून येत आहे.
या पार्श्वभूमीवर कॉलनीतील ज्येष्ठ नागरिकांनी संबंधित ठिकाणी तातडीने सीसीटीव्ही कॅमेरे बसवावेत, क्लीन मार्शलची नियुक्ती करावी तसेच कचरा टाकणाऱ्यांवर कडक दंडात्मक कारवाई करावी, अशी ठाम मागणी प्रशासनाकडे केली आहे. प्रशासनाने वेळीच दखल न घेतल्यास परिस्थिती अधिक गंभीर होण्याची शक्यता नागरिकांनी व्यक्त केली आहे.
प्रतिनिधी=गणेश नामदेव भेगडे.मो९९२१८०७०११
