दसऱ्याच्या उत्साहात व्यसनरुपी रावणाचे दहन, स्माईल व्यसनमुक्ती केंद्रातील प्रेरणादायी उत्सव — प्रत्येकाने आपल्या मनातील रावणाला जाळण्याचा केला संकल्प
उर्से : दसरा हा विजय, सत्य आणि सद्गुणांचा सण. मात्र, जेव्हा हा सण व्यसनमुक्ती केंद्रात साजरा होतो, तेव्हा त्याचे स्वरूप अधिक भावनिक आणि प्रेरणादायी ठरते. स्माईल व्यसनमुक्ती केंद्रात यंदाचा दसरा असा एक अनोखा आणि अविस्मरणीय अनुभव ठरला. व्यसनातून मुक्त होण्यासाठी झगडणाऱ्या रुग्ण मित्रांनी आणि कार्यकर्त्यांनी मिळून या उत्सवाला एक वेगळीच ऊर्जा दिली. या क्षणाने त्यांच्या मनात आशेचा दीप उजळला आणि प्रत्येकाने आपल्या मनातील व्यसनरुपी रावण जाळण्याचा संकल्प केला.
दसऱ्याच्या निमित्ताने रुग्ण मित्रांनी ‘राम जन्म ते रावण वध’ या विषयावर आधारित हृदयस्पर्शी नाटिका सादर केली. या नाटिकेतून व्यसनमुक्तीचा संघर्ष आणि जीवनातील सकारात्मक बदल यांचे प्रभावी चित्रण घडले. राम, सीता, लक्ष्मण आणि रावण या पात्रांमधून व्यसनाच्या जंजाळातून बाहेर पडण्याची जिद्द आणि संघर्ष प्रकट झाला. नाटिकेनंतर झालेल्या रावण दहन कार्यक्रमात उपस्थितांनी आपल्या अंतःकरणातील व्यसनरुपी व स्वभावदोषरुपी रावणाला प्रतीकात्मकरीत्या जाळले. हा क्षण सर्वांसाठी भावनिक विजयाचा ठरला.
या कार्यक्रमाला प्रमुख पाहुणे म्हणून इंडियो नेटवर्क्सचे संस्थापक माननीय श्री. ऋषिकेश घारे, लोहगड विसापूर विकास मंचचे संस्थापक माननीय श्री. सचिन ज्ञानेश्वर टेकवडे व रोटरी क्लब ऑफ गोल्डन तळेगाव दाभाडे चे रो. दीपकजी फल्ले उपस्थित होते.
मान्यवरांनी रुग्ण मित्रांशी संवाद साधत व्यसन आणि स्वभावदोष हे रावण असल्याचे अधोरेखित केले. खेळ, छंद आणि सकारात्मक जीवनशैली अंगीकारल्यास व्यसनमुक्तीचा प्रवास अधिक सोपा होतो, असे ते म्हणाले. तसेच प्रोत्साहनपर भेट म्हणून केंद्राला सायकल भेट दिली. “आजच्या दिवशी व्यसनरुपी रावणाचे दहन झाले,” या वाक्याने उपस्थितांच्या मनात नवी प्रेरणा निर्माण झाली.
कार्यक्रमाची सुरुवात स्माईल व्यसनमुक्ती केंद्राचे संस्थापक श्री. हर्षल पंडित यांच्या प्रास्ताविकाने झाली. त्यांनी व्यसनमुक्तीतील आव्हाने आणि विजय यांचा प्रभावी आढावा मांडला. यानंतर प्रतिरूप मुद्रणालय, पुणे चे मालक मा. श्री. शैलेंद्र भागवत यांनी आपले मनोगत व्यक्त केले.
रो. दीपकजी फल्ले यांनी व्यसनमुक्तीचे सामाजिक आणि कौटुंबिक महत्त्व अधोरेखित केले. मान्यवरांच्या प्रेरणादायी संदेशाने रुग्ण मित्रांना नव्या ऊर्जेचा अनुभव मिळाला. कार्यक्रमाचे उत्कृष्ट सूत्रसंचालन स्माईलचे श्री. हर्षल जोशी यांनी केले.
या कार्यक्रमाच्या यशामागे स्माईल व्यसनमुक्ती केंद्रातील कार्यकर्त्यांचा मोलाचा सहभाग होता. श्री. राहुल बोरुडे, श्री. प्रकाश धीडे, श्री. प्रणव देशमुख, श्री. अमोल कुलकर्णी, श्री. नितीन नाटेकर, श्री. अनिल सावंत, श्री. आनंद भागवत, श्री. जयंत खेर्डेकर, श्री. अजिंक्य देशपांडे, श्री. निलेश साळुंखे, श्री. राजेंद्र ढूस, श्री. अमेय कुलकर्णी, श्री. गणेश गुंडरे आदींनी या उत्सवासाठी अपार मेहनत घेतली. त्यांच्या प्रयत्नांमुळे कार्यक्रम केवळ मनोरंजन न राहता एक भावनिक आधार बनला.
दसऱ्याच्या या उत्सवाने स्माईल व्यसनमुक्ती केंद्रातील रुग्ण मित्रांच्या मनात आशेचा प्रकाश जागवला. व्यसनमुक्तीचा प्रवास हा आव्हानात्मक असला, तरी अशा प्रेरणादायी उपक्रमांमुळे तो अधिक सकारात्मक आणि उत्साही होतो. स्माईलसारख्या संस्था समाजासाठी दीपस्तंभ आहेत, ज्या व्यसनग्रस्तांना नवे जीवन देतात.
रावण दहनाच्या ज्वाळांमध्ये जसा अंधकाराचा अंत होतो, तसाच व्यसनाचा नाश व्हावा हीच सर्वांची प्रार्थना होती. हा उत्सव केवळ एक सोहळा नसून व्यसनमुक्तीच्या मार्गावर एक नवा अध्याय ठरला.
प्रतिनिधी : गणेश नामदेव भेगडे, मो. ९९२१८०७०११
