भात कापणीदरम्यान शेतात १२फूट अजगराचा थरार — वन्यजीव रक्षकांच्या तत्परतेने सुरक्षित सुटका
कुसगाव खुर्द (ता. मावळ) : कुसगाव खुर्द येथे भात कापणी सुरू असताना शेतात तब्बल १२ फूट लांबीचा अजगर आढळून आला. योगेश शांताराम लालगुडे हे आपल्या शेतात भात कापणीचे काम करत असताना हा प्रसंग घडला.
भात कापणी सुरू असताना त्यांच्या समोर वेटोळे घालून बसलेला मोठा अजगर दिसल्याने त्यांनी तत्काळ काम थांबवून वन्यजीव रक्षक मावळ संस्थेचे अध्यक्ष अनिल आंद्रे यांच्याशी संपर्क साधला.
घटनेची माहिती मिळताच अनिल आंद्रे यांनी त्वरित घटनास्थळी धाव घेतली. त्यांनी पाहणी केल्यावर तो साप ‘इंडियन रॉक पायथन’ या जातीचा असून अंदाजे १२ फूट लांबीचा असल्याचे निदर्शनास आले.
आंद्रे यांनी योग्य पद्धतीने अजगराला पकडून त्याची प्राथमिक तपासणी केली. त्यानंतर वनविभागाच्या अधिकाऱ्यांशी समन्वय साधून त्याला त्याच्या नैसर्गिक अधिवासात सुरक्षितरित्या सोडण्यात आले, अशी माहिती वन्यजीव रक्षक मावळ संस्थेचे संस्थापक निलेश संपतराव गराडे यांनी दिली.
या बचाव मोहिमेत संस्थेचे कार्यकर्तेही उपस्थित होते. शेतकऱ्यांनी वन्यजीवांविषयी जागरूकता दाखवत दिलेली तत्पर माहिती व वन्यजीव रक्षकांची जलद कारवाई यामुळे एक मोठा अपघात टळला.
प्रतिनिधी=गणेश नामदेव भेगडे.मो९९२१८०७०११
