तळेगावच्या राजकारणात भूचाल: भेगडे–शेळके एकत्र, महायुतीची घोषणा
तळेगाव दाभाडे : तळेगावच्या स्थानिक राजकारणात आज मोठा राजकीय भूकंप झाला आहे. दीर्घकाळ एकमेकांचे कट्टर विरोधक म्हणून ओळखले जाणारे भाजपाचे माजी राज्यमंत्री संजय बाळा भेगडे आणि राष्ट्रवादी काँग्रेस (अजित पवार गट)चे आमदार सुनील शेळके अखेर एका मंचावर आले आहेत.
पत्रकार परिषदेत दोन्ही नेत्यांनी एकमेकांना टाळी देत महायुतीवर अधिकृत शिक्कामोर्तब केले. त्यामुळे तळेगावच्या स्थानिक राजकारणात नव्या समीकरणांची निर्मिती झाली असून, आगामी निवडणुकांसाठी राजकीय रंगत अधिक चढली आहे.
या पत्रकार परिषदेत माजी मंत्री भेगडे आणि आमदार शेळके यांनी संयुक्तपणे नगरपरिषद निवडणुकीसाठी महायुतीची घोषणा केली. यावेळी त्यांनी तळेगाव दाभाडे नगरपरिषद नगराध्यक्षपदी संतोष दाभाडे (पाटील )तसेच गणेश काकडे यांना संधी देण्याची घोषणा केली.
या ऐतिहासिक एकत्रीकरणानंतर तळेगावच्या राजकारणात नवे सत्तासमीकरण निर्माण झाले आहे. दोन्ही नेत्यांच्या समर्थकांमध्ये उत्साहाचे वातावरण असून, स्थानिक पातळीवर या निर्णयाचे दूरगामी परिणाम दिसतील, अशी राजकीय वर्तुळातील प्रतिक्रिया आहे.
भेगडे–शेळके यांची ही एकजूट तळेगावातील राजकीय दिशा बदलणारी ठरेल, असा अंदाज व्यक्त केला जात आहे.
प्रतिनिधी=गणेश नामदेव भेगडे.मो९९२१८०७०११
