मुख्य दाबनलिकेला गळती; सोमवारी तळेगाव शहरातील पाणीपुरवठा बंद
तळेगाव दाभाडे : तळेगाव दाभाडे शहराला पाणीपुरवठा करणारी मुख्य दाबनलिका सोमाटणे गावाच्या हद्दीत गळती झाल्याने शहरातील काही भागात सोमवारी (दि. १० नोव्हेंबर २०२५) रोजी पाणीपुरवठा बंद राहणार आहे. दुरुस्तीचे काम सुरू असून, ते पूर्ण होताच पाणीपुरवठा पूर्ववत करण्यात येणार असल्याची माहिती नगरपरिषदेचे मुख्याधिकारी गिरीश दापकेकर यांनी दिली.
नगरपरिषदेच्या पाणीपुरवठा विभागाकडून मिळालेल्या माहितीनुसार, सोमाटणे गाव परिसरात असलेल्या मुख्य दाबनलिकेत मोठी गळती झाली आहे. त्यामुळे शहरातील वडगाव फाटा ते जनरल हॉस्पिटल या दरम्यानचा भाग — म्हणजेच शहरातील मध्यवर्ती विभाग — याठिकाणी सकाळी १० ते संध्याकाळी १० वाजेपर्यंत पाणीपुरवठा पूर्णपणे बंद राहील.
दुरुस्तीचे काम तातडीने सुरू करण्यात आले असून, नगरपरिषदेच्या अभियंता व कामगार पथकाने घटनास्थळी जाऊन गळती दुरुस्तीचे प्रयत्न सुरू केले आहेत. गळतीचा पट्टा मोठा असल्याने काम पूर्ण होण्यासाठी काही वेळ लागणार असल्याचे अधिकाऱ्यांनी सांगितले.
मुख्याधिकारी दापकेकर म्हणाले, “गळतीचे स्वरूप मोठे असल्याने सोमवारी दिवसभर संबंधित भागात पाणीपुरवठा बंद ठेवावा लागणार आहे. नागरिकांनी या दरम्यान पाणी जपून वापरावे. दुरुस्तीचे काम पूर्ण झाल्यानंतर तात्काळ पाणीपुरवठा सुरळीत करण्यात येईल.
नगरपरिषदेने नागरिकांना पुढील गोष्टींचे पालन करण्याचे आवाहन केले आहे .
सोमवारच्या पाणीपुरवठा बंदीपूर्वी घरगुती आवश्यकतेपुरते पाणी साठवून ठेवावे.
पाणी वापरात काटकसरीचा अवलंब करावा.
अनावश्यक वापर टाळावा.
दरम्यान, नगरपरिषदेच्या कर्मचाऱ्यांनी रात्रीपर्यंत गळती दुरुस्त करण्याचे प्रयत्न सुरू ठेवण्याची तयारी दाखवली आहे. दुरुस्तीचे काम वेळेत पूर्ण झाल्यास मंगळवारपासून पाणीपुरवठा पूर्ववत होण्याची शक्यता आहे.
प्रतिनिधी=गणेश नामदेव भेगडे.मो९९२१८०७०११
