वडगाव नगरपंचायत निवडणूक : नगराध्यक्ष पदाच्या उमेदवार मृणाल म्हाळसकर यांची प्रभाग ११ व १२ मध्ये घरोघरी भेट मोहीम
वडगाव｜वडगाव नगरपंचायत सार्वत्रिक निवडणुकीच्या पार्श्वभूमीवर नगराध्यक्ष पदाच्या उमेदवार मृणाल गुलाबराव म्हाळसकर यांनी प्रभाग क्रमांक ११ आणि १२ मध्ये नागरिकांशी संवाद साधण्यासाठी घरोघरी भेट दौरा आयोजित केला. या भेटीदरम्यान नागरिकांनी व्यक्त केलेला स्नेह, आदर आणि आत्मीयतेमुळे हा दौरा अधिक उत्साहपूर्ण ठरला.
प्रभाग क्रमांक ११ चे उमेदवार किरण रघुनाथ म्हाळसकर आणि प्रभाग क्रमांक १२ चे उमेदवार राजेंद्र हनुमंत म्हाळसकर यांच्या उपस्थितीत हा दौरा पार पडला. स्थानिक समस्या, विकासासाठी आवश्यक उपाययोजना, तसेच सुशोभीकरण आणि सुविधावृद्धी याबाबत नागरिकांशी विस्तृत चर्चा झाली. परिसरातील रस्ते, पाणीपुरवठा, स्वच्छता आणि सार्वजनिक सोयीसुविधा यांसारख्या मुद्यांवर नागरिकांनी आपली मते स्पष्टपणे मांडली.
नागरिकांनी व्यक्त केलेल्या अपेक्षा आणि विश्वासामुळे आमच्या जबाबदाऱ्या अधिक वाढत असल्याचे मृणाल म्हाळसकर यांनी सांगितले. वडगावच्या सर्वांगीण प्रगतीसाठी सातत्याने काम करण्याचा निर्धार त्यांनी व्यक्त केला. “नागरिकांच्या सहभागातून वडगावला ‘आदर्श नगरी’ बनवण्याचा संकल्प आम्ही अधिक दृढ करीत आहोत,” असेही त्यांनी यावेळी नमूद केले.
निवडणूक प्रचाराच्या पुढील टप्प्यातही नागरिकांशी थेट संवाद साधून त्यांच्या समस्या जाणून घेण्यास प्राधान्य देण्यात येणार असल्याची माहिती उमेदवारांकडून देण्यात आली.
