वडगाव भाजपा पक्ष कार्यालयात सेवा पंधरवडा कार्यशाळा कार्यक्रमाचे आयोजन
वडगाव (ता. मावळ) : पंतप्रधान नरेंद्र मोदी यांच्या वाढदिवसाचे औचित्य साधून भाजपाच्या वतीने देशभर आयोजित सेवा पंधरवडा उपक्रमाचा एक भाग म्हणून वडगाव येथे शुक्रवार (दि. १२ सप्टेंबर) रोजी पक्ष कार्यालयात कार्यशाळेचे आयोजन करण्यात आले. हा कार्यक्रम उत्साहात पार पडला.
उपक्रमाचे महत्त्व स्पष्ट
या वेळी भाजपा जिल्हा सरचिटणीस डॉ. ताराचंद कराळे यांनी सेवा पंधरवडा उपक्रमाचे सविस्तर उद्दिष्ट व कार्यपद्धती याबाबत माहिती दिली. त्यांनी या काळात विविध सेवा उपक्रमांची अंमलबजावणी कशी करावी, जनतेपर्यंत थेट कसे पोहोचावे याचे मार्गदर्शन केले.
“सेवा म्हणजे सामाजिक बांधिलकी” – संजय भेगडे
कार्यक्रमात बोलताना माजी राज्यमंत्री संजय बाळा भेगडे म्हणाले की, “सेवा पंधरवडा हा केवळ सेवाभावाचा कार्यक्रम नाही तर तो सामाजिक बांधिलकी, जनतेशी एकरूप होणे व उत्तरदायित्व या मूल्यांचा साक्षात प्रतीक आहे. शासनाच्या विविध योजनांचा लाभ पात्र नागरिकांपर्यंत पोहोचवण्याचे हे प्रभावी साधन आहे.”
ते पुढे म्हणाले की, या उपक्रमामध्ये आरोग्य सेवा, शिक्षण, रोजगार, सामाजिक न्याय, महिला व बालकल्याण, शेतकरी योजना अशा अनेक क्षेत्रातील सेवा एकाच ठिकाणी नागरिकांना उपलब्ध करून देण्यात येतील. शासन आणि जनतेमधील सेतू अधिक बळकट करण्यासाठी हा उपक्रम महत्त्वाचा ठरेल. समाजातील शेवटच्या घटकापर्यंत या सेवांचा लाभ पोहोचावा यासाठी नागरिकांनी मोठ्या संख्येने सहभागी व्हावे, असे आवाहन त्यांनी केले.
उपस्थिती व उत्साह
या कार्यशाळेला भाजपा किसान मोर्चाचे प्रदेशाध्यक्ष गणेश किसनराव भेगडे, तसेच मावळ तालुक्यातील भाजपाचे सर्व प्रमुख पदाधिकारी, कार्यकर्ते मोठ्या संख्येने उपस्थित होते. उत्साहपूर्ण वातावरणात हा उपक्रम पार पडला.
प्रतिनिधी : गणेश नामदेव भेगडे (मो. ९९२१८०७०११)
