देहूरोड बुद्ध विहार वर्धापन दिनानिमित्त वाहतुकीत मोठे बदल; जुना मुंबई–पुणे महामार्ग दिवसभर बंद
देहूरोड : देहूरोड येथील ऐतिहासिक बुद्ध विहाराच्या ७१ व्या वर्धापन दिनानिमित्त २५ डिसेंबर २०२५ रोजी मोठ्या प्रमाणावर भाविक व अनुयायी दाखल होणार आहेत. या पार्श्वभूमीवर पिंपरी-चिंचवड पोलीस आयुक्तालयाच्या वाहतूक शाखेने देहूरोड परिसरात वाहतूक नियंत्रणाबाबत विशेष अधिसूचना जारी केली आहे. भाविकांची सुरक्षितता तसेच वाहतुकीचा सुरळीत प्रवाह राखण्यासाठी सकाळी ४.०० वाजल्यापासून मध्यरात्री १२.०० वाजेपर्यंत तात्पुरते वाहतूक बदल लागू राहणार आहेत.
या अधिसूचनेनुसार २५ डिसेंबर रोजी जुना मुंबई–पुणे महामार्ग पूर्णपणे बंद ठेवण्यात येणार आहे. सेंट्रल चौक, देहूरोड ते भक्ती शक्ती चौक या मार्गावर मुंबईकडे तसेच पुण्याकडे जाणाऱ्या सर्व प्रकारच्या वाहनांना प्रवेशास मनाई करण्यात आली आहे. त्यामुळे या मार्गाने प्रवास करणाऱ्या वाहनचालकांनी पर्यायी मार्गांचा वापर करावा, असे आवाहन करण्यात आले आहे.
सेंट्रल चौकातून येणाऱ्या वाहनचालकांनी उजवीकडे वळून बेंगलोर हायवेने मुकाई चौक मार्गे आपल्या इच्छित स्थळी जावे. तर भक्ती शक्ती सर्कलच्या दिशेने येणाऱ्या वाहनांसाठी दोन पर्यायी मार्ग उपलब्ध करून देण्यात आले आहेत. त्यानुसार वाहनचालकांनी डावीकडे वळून अप्पू घर कॉर्नर, बिग इंडिया चौक, धर्मराज चौक, हँगिंग ब्रिज मार्गे प्रवास करावा. अथवा डावीकडे वळून अप्पू घर कॉर्नर येथून नवीन पुलावरून मुकाई चौक मार्गे पुढील प्रवास करावा, असे नियोजन करण्यात आले आहे.
हे सर्व वाहतूक निर्बंध अत्यावश्यक सेवेतील वाहने – जसे की रुग्णवाहिका, अग्निशमन दल व पोलीस वाहने – यांना लागू राहणार नाहीत. मात्र इतर सर्व वाहनचालकांना या नियमांचे पालन करणे बंधनकारक राहील. नियमांचे उल्लंघन करणाऱ्यांवर कारवाई करण्यात येणार असल्याचेही पोलीस प्रशासनाने स्पष्ट केले आहे.
वाहतूक कोंडी टाळण्यासाठी, भाविकांना वेळेचे नियोजन करून प्रवास करण्याचे तसेच स्थानिक नागरिकांनी पोलीस प्रशासनाला सहकार्य करण्याचे आवाहन पोलीस उप-आयुक्त (वाहतूक शाखा) विवेक पाटील यांनी केले आहे. बुद्ध विहाराच्या वर्धापन दिनाचा सोहळा शांततेत व सुरक्षिततेत पार पडावा, यासाठी ही वाहतूक व्यवस्था अत्यावश्यक असल्याचे त्यांनी सांगितले.
प्रतिनिधी=गणेश नामदेव भेगडे.मो९९२१८०७०११
