कुसगाव बुद्रुक ग्रामपंचायत चे सदस्य संजय गुंड यांचे सदस्यत्व कायम
लोणावळा : शहराजवळील कुसगाव बुद्रुक ग्रामपंचायत चे सदस्य संजय तुकाराम गुंड यांचा राजीनामा नामंजूर करत त्यांचे सदस्यत्व कायम ठेवण्यात यावे असा आदेश पुणे जिल्हाधिकारी जितेंद्र डूडी यांनी दिला आहे. २०२१साली झालेल्या कुसगाव बुद्रुक ग्रामपंचायतच्या निवडणुकीत संजय गुंड हे सदस्य म्हणून निवडून आले होते.
२७ जुलै २०२२ रोजी ते कुसगाव बुद्रुक ग्रामपंचायत कार्यालयात मीटिंग साठी गेले असता त्यांना तुमचा राजीनामा मंजूर झाला असून तुमचे सदस्य पद रिक्त झाले असल्याने तुम्हाला मिटींगला बसता येणार नाही असे सांगण्यात आले. त्यावेळी संजय गुंड यांनी मी राजीनामा दिला नाही मग तो मंजूर कसा झाला व कोणी माझा राजीनामा लिहून दिला असल्याची विचारणा केली असता त्यांना उडवाउडवीची उत्तरे देण्यात आली. सदरचा तथाकथित राजीनामा गटविकास अधिकारी त्यांच्याकडे सादर करण्यात आला होता.
ग्रामपंचायतच्या मासिक सभेत हा विषय विषय पत्रिकेत न घेता ऐन वेळेचा विषय म्हणून घेण्यात आला. याबाबत अनेक कायदेशीर बाबी. वादविवाद. जबाब नोंदवल्यानंतर सदरचा राजीनामा मंजूर करताना महाराष्ट्र ग्रामपंचायत अधिनियम 1959 मधील तरतुदी चे पालन व विहित कार्यपद्धतीच्या अवलंब केला नसल्याचे निरीक्षण नोंदवत हा राजीनामा संजय गुंड यांनी दिलेला नसल्याचे अधोरेखित करत पुणे जिल्हाधिकारी जितेंद्र डुडी यांनी संजय गुंड यांचा ३० जून २०२२ रोजी मंजूर केलेला राजीनामा नामंजूर करत संजय गुंड यांचे सदस्य पद कायम ठेवण्याचा आदेश १३मे २०२५ रोजी दिला आहे.
प्रतिनिधी : गणेश नामदेव भेगडे.
