अंडी विक्रीच्या आड अंमली पदार्थांची विक्री; लोणावळ्यात पोलिसांची धडक कारवाई दोन जणांना अटक, एम.डी. पावडर जप्त
लोणावळा : लोणावळा शहरात पोलिसांनी केलेल्या एका धडक कारवाईत अंडी विक्रीच्या दुकानाच्या आडून अंमली पदार्थांची विक्री करणाऱ्या दोन संशयितांना अटक करण्यात आली आहे. पोलिसांनी या दोघांकडून मेफेड्रोन (एम.डी.) पावडर असा सुमारे ५ हजार रुपयांचा अंमली पदार्थ जप्त केला आहे. या प्रकरणी अंमली पदार्थ नियंत्रण कायदा (NDPS Act, 1985) अंतर्गत गुन्हा नोंदवून पुढील तपास सुरू आहे.
अंमली पदार्थविरोधी मोहिमेअंतर्गत पुणे ग्रामीण पोलीस अधीक्षक संदीपसिंह गिल, अपर पोलीस अधीक्षक रमेश चोपडे आणि उपविभागीय पोलीस अधिकारी गजानन टोम्पे यांच्या मार्गदर्शनाखाली ही कारवाई करण्यात आली. लोणावळा शहर पोलीस ठाण्याचे निरीक्षक राजेश रामाघरे यांच्या नेतृत्वाखाली पोलिसांचे विशेष पथक तयार करण्यात आले होते.
ही कारवाई ३१ ऑक्टोबर २०२५ रोजी सायंकाळी ४ वाजता लोणावळ्यातील जी वॉर्ड, इराणी चाळ येथील ‘सितारा एजन्सी’ (अंडी विक्रीचे दुकान) येथे करण्यात आली. पोलिसांना गुप्त माहिती मिळाल्यानंतर त्यांनी या ठिकाणी छापा टाकला. दुकानात संशयास्पद हालचाली आढळल्याने पोलिसांनी तपास सुरू केला असता अंडी विक्रीच्या आड अंमली पदार्थांची विक्री होत असल्याचे उघड झाले.
या ठिकाणी पोलिसांनी ताबान जायर पठाण (वय २९, रा. जी वॉर्ड, इराणी चाळ, लोणावळा) याच्याकडून १ ग्रॅम ३३० मिलीग्रॅम वजनाचा मेफेड्रोन (एम.डी.) पावडर, तर महीपाल साजनराम बिश्नोई (वय ३०, रा. म्हाडा कॉलनी, लोणावळा) याच्याकडून १ ग्रॅम ०३० मिलीग्रॅम एम.डी. पावडर असा मुद्देमाल जप्त केला.
प्राथमिक तपासात दोघांनीही हा अंमली पदार्थ विक्रीसाठी ठेवला असल्याचे पोलिस तपासात निष्पन्न झाले आहे. दोघांविरुद्ध NDPS कायद्यानुसार गुन्हा नोंदवण्यात आला असून, त्यांना न्यायालयासमोर हजर करण्यात आले आहे. पोलिसांनी जप्त केलेला पदार्थ तपासणीसाठी पाठविण्यात आला आहे.
या कारवाईबद्दल माहिती देताना पोलीस निरीक्षक राजेश रामाघरे म्हणाले, “अंमली पदार्थविरोधी मोहिमेअंतर्गत लोणावळा शहर परिसरात गस्त आणि गुप्त तपास वाढविण्यात आला आहे. स्थानिक पोलिसांनी मिळालेल्या गुप्त माहितीच्या आधारे ही कारवाई यशस्वीपणे पार पाडली.”
हि कारवाई सहाय्यक पोलीस निरीक्षक संतोष जाधव, पोहवा संदीप मानकर, राहुल चोरगे, हनुमंत वाळुंज, पोकॉ भूषण कुवर आणि प्रतीक बनसोडे यांच्या पथकाने केली.
सहाय्यक पोलीस निरीक्षक संतोष जाधव पुढील तपास करत आहेत.
दरम्यान, पोलिसांच्या या कारवाईमुळे लोणावळ्यात अंमली पदार्थ विक्रेत्यांमध्ये एकच खळबळ उडाली आहे. परिसरातील नागरिकांनी पोलिसांचे कौतुक करत अशा प्रकारच्या कारवायांना आणखी गती देण्याची मागणी केली आहे. पोलिसांनी देखील नागरिकांना आवाहन केले आहे की, संशयास्पद व्यक्ती किंवा हालचाली दिसल्यास तत्काळ पोलीस ठाण्याशी संपर्क साधावा.
प्रतिनिधी=गणेश नामदेव भेगडे.मो९९२१८०७०११
