आमदार सुनील शेळके यांच्या प्रमुख उपस्थितीत तळेगाव दाभाडे इंडस्ट्रियल असोसिएशनची महत्त्वपूर्ण बैठक
नवलाख उंब्रे : तळेगाव दाभाडे इंडस्ट्रियल असोसिएशनची महत्त्वपूर्ण बैठक आमदार सुनील शेळके यांच्या प्रमुख उपस्थितीत उत्साहपूर्ण वातावरणात पार पडली. या बैठकीत उद्योग क्षेत्राचा विकास, रस्ते, वाहतूक, वीजपुरवठा तसेच स्थानिक कामगारांच्या सोयीसाठी महत्त्वपूर्ण निर्णय घेण्यात आले.
बैठकीत आमदार शेळके यांनी चाकण–शिंदे वसुली व शिंदे वसुली–पॉवर हाऊस मार्गावरील प्रलंबित रस्त्यांची कामे तातडीने पूर्ण करण्याच्या स्पष्ट सूचना संबंधित विभागांना दिल्या. या निर्णयामुळे औद्योगिक क्षेत्रातील वाहतुकीची समस्या मोठ्या प्रमाणात सुटणार असल्याचे स्पष्ट करण्यात आले.
कामगारांच्या सोयीसाठी पीएमपीएमएल बस सेवा शिंदे वसुलीपर्यंत वाढविण्याचा ठोस निर्णय घेण्यात आला. त्यामुळे या भागात काम करणाऱ्या हजारो कामगारांना मोठा दिलासा मिळणार आहे. तसेच अपघात टाळण्यासाठी जिल्हाधिकाऱ्यांच्या अध्यक्षतेखाली झालेल्या बैठकीत ७० ते ८० ट्रॅफिक वॉर्डन नेमण्याचा निर्णय घेण्यात आला. याशिवाय हुंदाई कंपनीलगत सेवा रस्त्याचे रुंदीकरण व इतर प्रलंबित रस्त्यांची कामे तातडीने सुरू करण्याची ग्वाही अधिकाऱ्यांनी दिली.
औद्योगिक क्षेत्रातील सर्वात गंभीर समस्या ठरलेल्या वीजपुरवठा खंडित होण्याच्या मुद्द्यावरही आमदार शेळके यांनी ठोस भूमिका घेतली. वीजपुरवठा वारंवार खंडित झाल्यामुळे उत्पादनावर होणारा परिणाम उद्योग क्षेत्राच्या प्रतिनिधींनी स्पष्ट केला.
बैठकीत उपस्थित कंपन्यांच्या प्रतिनिधींनी सीएसआर फंडातून मावळ तालुक्यातील सामाजिक विकासकामांना सहकार्य करण्याचे आश्वासन दिले. यावर आमदार शेळके यांनी सीएसआर निधी स्थानिक विकासासाठी वापरण्याची मागणी ठामपणे मांडली.
या बैठकीत घेतलेले निर्णय उद्योग क्षेत्राचा विकास, वाहतूक व्यवस्थेतील सुधारणा, वीजपुरवठा आणि स्थानिक समाजाच्या सोयीसाठी अत्यंत महत्त्वपूर्ण ठरणार आहेत, असा विश्वास सर्वांनी व्यक्त केला.
बैठकीस तळेगाव दाभाडे इंडस्ट्रियल असोसिएशनच्या अध्यक्षा श्रीमती अनु सेठी, उपाध्यक्ष जगदीश यादव, तळेगाव एमआयडीसी पोलीस ठाण्याचे वरिष्ठ पोलीस निरीक्षक रणजीत जाधव यांच्यासह एफ ई व्हि इंडिया, एल अँड टी डिफेन्स, इनसेन प्रायव्हेट लिमिटेड, हुसको हायड्रोलिक, एॅटलास कोपको, ओगनिबेनी इंडिया लिमिटेड, पोस्को आयपीसी प्रायव्हेट लिमिटेड, चिकात्सो इंडिया, शेक्लर इंडिया, के एस एस प्रायव्हेट लिमिटेड, ए एम लाब्ररिग, बोर्गनॅर इंडिया, व्हिटेस्को टेक्नॉलॉजी, एस एच पिटकर, विनो २ एफ ठी आदी नामांकित कंपन्यांचे वरिष्ठ अधिकारी व प्रतिनिधी मोठ्या संख्येने उपस्थित होते.
प्रतिनिधी : गणेश नामदेव भेगडे ९९२१८०७०११
